ATH! Tour de Orminum 2020 aflýst

Stjórn UÍA hefur ákveðið að aflýsa hjólreiðakeppninni Tour de Orminum sem halda átti laugardaginn 15. ágúst.

Ákvörðunin er tekin í ljósi takmarkana á fjöldasamkomunum og íþróttastarfi vegna Covid-19 faraldursins. Stjórn UÍA telur erfitt að halda keppnina við þær aðstæður sem nú eru uppi og rétt að sýna ábyrgð til að tryggja heilsu og öryggi keppenda, sjálfboðaliða og íbúa.

Skrifstofa UÍA hefur hafið undirbúning að endurgreiðslu greiddra skráningargjalda.

Stjórn UÍA minnir á að hreyfing er mikilvæg nú sem fyrr og hvetur bæði hjólreiðaáhugamenn og Austfirðinga alla til að nota síðustu daga sumarsins til útivistar og íþrótta.

 

 

Tour de Ormurinn er hjólreiðakeppni á Fljótsdalshéraði og í Fljótsdalshreppi. Hann hóf göngu sína árið 2012 og hefur keppandafjöldi farið stigvaxandi síðan þá.

Hjólaleiðir eru tvær, annars vegar 68 km og hins vegar 103 km og boðið er uppá einstaklings- og liðakeppni.

Keppnin er opin öllum 12 ára og eldri. Hjólað er umhverfis Löginn í styttri hringnum en inn í botn Fljótsdals í þeim lengri.

Rás- og endamark er staðsett á Egilsstöðum. Mikil áhersla er lögð á öryggismál, unnið er í góðu samstarfi við lögregluna.

Fjöldi sjálfboðaliða kemur að framkvæmd keppninnar og hafa skipuleggendur keppninnar fengið mikið hrós frá þátttakendum fyrir öfluga og sýnilega brautarvörslu.

Metnaður er lagður í að umgjörð keppninnar beri austfiskri menningu, sögu og náttúru.